Nkuko asanzwe abikora mu ntangiriro za buri kwezi, Umushumba mukuru w’Itorero rya Zion Temple ku isi, Intumwa y’Imana (Apostle) Dr Paul Gitwaza, yagaragaje ibintu bitandukanye asengera ngo bizasohore ku bantu mu kwezi kwa Kanama 2025.
Ati“…Uku kwezi kuzakubere ukwezi ko kwinjira mu nshingano zawe.
Ndasenga ngo Imana ikingure amarembo afunze ku muhamagaro wawe, imigisha yawe, ubuzima n’ubutunzi bwawe, ibyo umwanzi (Satani) yabibye muri twe bivemo mw’izina rya Yesu.”
Gukemura ibibazo byo muri Africa:
Intumwa y’Imana (Apostle) Dr Paul Gitwaza, yakanguriye abakomoka ku mugabane wa Africa kwiyumvamo inshingano zo kuwuteza imbere.
“Ndatura ngo umugabane wacu w’Africa ko ari jyewe nawe tugomba guhagarara mu nshingano zawo, tugakemura ikibazo cy’umugabane wacu ugatera imbere. Habwa umugisha no kwinjira mu masezerano yawe.”
Gukomera kwa Yesu nk’igisubizo cy’Africa:
Intumwa y’Imana (Apostle) Dr Paul Gitwaza, yasabiye kandi asengera abatuye Africa.
Ati“ Ndasenga ngo Imana iguhagurutse mu bakomeye bazahindura uyu mugabane, ndatura gukomera maze izina ryawe rigakora ibikomeye, izina ryawe rikimakaza gukomera kwa Yesu nk’igisubizo cy’Africa.”
Yakomeje ati“ Ndasenga ngo amahanga n’amoko y’abantu atarumva ubutumwa bwiza, babwumve bakizwe kugira ngo imbaraga no gukomera bigaragare.”
Umushumba Mukuru w’Itorero rya Zion Temple ku isi, Intumwa y’Imana (Apostle) Dr Paul Gitwaza, yasengeye abantu n’ibihugu ngo buzure Umwuka wera.
“Uwikeka ahe umugisha umuryango wawe, igihugu cyawe kizamurwe ndetse n’itorero ryawe ryuzure Umwuka n’amavuta by’Uwiteka.”
